IVAN KRASINИВАН КРАСИН

(1917, Chelyabinsk viloyati — 1980, Qo‘g‘ay) — mexanik muhandis, xo‘jalik rahbari, O‘zbekistonda xizmat ko‘rsatgan mexanizator. Sirdaryo viloyati 2-Dalvarzin davlat xo‘jaligida ishchi (1939 yilgacha), texnika ustaxonasida mudir yordamchisi, mudir (1939-41) bo‘lib ishladi. 1941-47 yillarda harbiy xizmatda, fashizmga qarshi urush qatnashchisi. Urushdan keyin «Norin» davlat xo‘jaligi (hozirgi «Qo‘g‘ay» shirkatlar uyushmasi)da traktorchi, bosh mexanik (1947-54), Andijon viloyati «Savay» davlat xo‘jaligida direktor muovini (1954-57), «Norin» davlat xo‘jaligida direktor muovini va direktor (1957-59), tuman texnika ta’mirlash zavodida direktor (1975-80) vazifalarida ishlaydi. Ivan Krasin tuman xo‘jaliklarini qishloq xo‘jaligi texnikalari bilan ta’minlash, zamonaviy texnika vositalaridan foydalanishni joriy etishning jonkuyar, tajribali tashkilotchilaridan edi. Ta’mirlash zavodining kengayishi, moddiy-texnik jihatdan baquvvat tashkilotga aylanishi ham uning nomi bilan bog‘liq. «Mehnat qizil bayroq» ordeni, «Shavkatli mehnati uchun», «Germaniya ustidan qozonilgan g‘alaba uchun», «Yaponiya ustidan qozonilgan g‘alaba uchun» va boshqa medallar bilan taqdirlangan. Qo‘g‘ay qishlog‘i «Birodarlik» qabristoniga dafn etilgan.